Martın 17-də Naxçıvan Dövlət Universitetində (NDU) Naxçıvan Muxtar Respublikası Ədliyyə Nazirliyinin və universitetin birgə təşkilatçılığı ilə “Konstitusiya və Suverenlik ili: Yerli özünüidarəetmənin hüquqi əsasları” mövzusunda tədbir keçirilib. Tədbirdə Ədliyyə Nazirliyinin əməkdaşları, universitetin pedaqoji heyəti və tələbələr iştirak ediblər.

Tədbiri giriş sözü ilə açan fakültə dekanı, iqtisadiyyat üzrə fəlsəfə doktoru, dosent Əşrəf Ələkbərov bu cür tədbirlərin təhsildə tələbələrin nəzəri biliklərinin praktikidi tətbiqi məsələlərində yeni biliklər qazanmasına müsbət təsir etdiyini vurğulayıb və əməkdaşlığa görə ədliyyə nazirliyinin əməkdaşlarına təşəkkür edib.

Daha sonra Naxçıvan Muxtar Respublikası Ədliyyə Nazirliyi Bələdiyyələrlə iş şöbəsinin rəisi Xəyal Eyvazov “Konstitusiya və Suverenlik ilində yerli özünüidarəetmənin qarşısında duran vəzifələr” mövzusunda çıxış edib. Elan edilmiş bu ildə həm Ulu Öndər Heydər Əliyevin müəllifi olduğu Azərbaycan Respublikası Konstitusiyasının 30 illiyi, həm də Müzəffər Ali Baş Komandanın rəhbərliyi ilə Vətən müharibəsində qazanılan Zəfərin 5 illiyi qeyd olunur və dövlətçilik tariximizin daha dərindən öyrənilməsi baxımından xüsusi əhəmiyyət daşıyır. Dövlət başçısının imzaladığı sərəncam, ölkəmizin keçmişi, bu günü və gələcəyi üçün mühüm məna kəsb edərək hüquqi dövlətçilik dəyərlərinin yeni çağırışlar əsasında formalaşması üçün geniş imkanlar yaradır. Bu gün bələdiyyə idarəetməsi sahəsində təhsil alan tələbələrin iştirakı ilə keçirilən tədbirdə Azərbaycan Respublikasının Konstitusiyasında yerli özünüidarəetmənin təsbiti, "Konstitusiya və Suverenlik İli" çərçivəsində əsas insan hüquq və azadlıqları, həmçinin onların tətbiqi mexanizmləri barədə ətraflı məlumat verildi.

Tədbirdə həmçinin Ordubad rayonu Dəstə bələdiyyəsinin sədri Tofiq Babayev və NDU-nun Bələdiyyə və turizm kafedrasının müdiri, fəlsəfə üzrə fəlsəfə doktoru Flora Kərimova çıxış ediblər. Onlar gənclər siyasətinin həyata keçirilməsində yerli özünüidarəetmə orqanlarının rolunun vacibliyini qeyd ediblər.

Tədbirin sonunda mövzu ətrafında müzakirələr aparılıb və iştirakçıların sualları cavablandırılıb.