Bu gün azərbaycanlılara qarşı erməni daşnaklarının bolşeviklərlə birgə həyata keçirdiyi soyqırımın 107-ci ildönümüdür.

Azərbaycan xalqına qarşı törədilmiş bu faciənin əsası XIX əsrdə – 1813-cü və 1828-ci illərdə imzalanmış Gülüstan və Türkmənçay müqavilələri ilə qoyulub. Həmin dövrdən etibarən tarixi torpaqlarımızın bölünməsi və ermənilərin kütləvi şəkildə Azərbaycan ərazilərinə köçürülməsi prosesi başlayıb. “Böyük Ermənistan” ideyası ilə hərəkət edən erməni silahlı dəstələri müxtəlif dövrlərdə azərbaycanlılara qarşı genişmiqyaslı qırğınlar həyata keçirib.

1918-ci ilin mart ayında Bakı şəhəri və Bakı quberniyasına daxil olan Şamaxı, Quba və digər şəhər və qəzalar erməni-bolşevik silahlı birləşmələrinin hücumlarına məruz qalıb. Nəticədə on minlərlə dinc sakin etnik və dini mənsubiyyətinə görə qətlə yetirilib, yaşayış məntəqələri dağıdılıb, mədəniyyət abidələri, məscid və qəbiristanlıqlar məhv edilib. Eyni faciəvi hadisələr Qarabağ, Zəngəzur, Naxçıvan, Şirvan, İrəvan və digər bölgələrdə də baş verib.

1998-ci il martın 26-da Ümummilli Lider Heydər Əliyevin imzaladığı fərmanla 31 Mart Azərbaycanlıların Soyqırımı Günü elan edilib. 2013-cü ildə isə Qubada bolşevik-erməni silahlı dəstələrinin törətdiyi qırğınların qurbanlarının xatirəsinə Quba Soyqırımı Memorial Kompleksi inşa olunub.

100 ildən artıq davam edən soyqırımı siyasəti 2020-ci ildə Azərbaycanın Vətən müharibəsində qazandığı tarixi qələbə və 2023-cü ilin Antiterror əməliyyatı ilə dayandırıldı. Bu qələbə ilə Azərbaycan torpaqlarının işğalına və etnik təmizləmə siyasətinə son qoyuldu.