Novruz – yazın gəlişinin simvolu olan qədim xalq bayramıdır və “Yeni gün” mənasını daşıyır.

Şimal yarımkürəsində astronomik yazın başlanğıcı – gecə-gündüz bərabərliyi martın 20-si, 21-i və ya 22-nə təsadüf edir. Bir çox xalqlar yaz fəslinin gəlişini təbiətin canlanması ilə əlaqələndirərək şənliklər keçirir və bu günü yeni ilin başlanğıcı kimi bayram edirlər.

Qədim zamanlardan etibarən İran, Əfqanıstan, Tacikistan, Özbəkistan və digər Şərq xalqları ilə yanaşı, Azərbaycan türkləri də baharın – yeni ilin gəlişini təntənəli şəkildə qeyd edirlər.

2009-cu il sentyabrın 30-da Novruz bayramı UNESCO tərəfindən qeyri-maddi mədəni irs siyahısına daxil edilib. 2010-cu il fevralın 23-də isə BMT martın 21-ni “Beynəlxalq Novruz Günü” elan edib.

Bu il yaz fəsli Azərbaycana martın 20-si saat 13:01:25-də daxil olacaq.

Novruz və Ramazan bayramları ilə əlaqədar 20-31 mart tarixləri qeyri-iş günü elan edilib.